သောင်းတိုက်ကကြားရစေသားဇာတ်ကားနဲ့ ပရိသတ်တွေရှေ့ ပြန်လည်ရောက်ရှိလာတော့မယ့် အကယ်ဒမီ မယ်လိုဒီ

13620166_517090015160735_5091536945394548932_n.jpg

၂၀၀၄ ခုနှစ်နိုဝင်ဘာလမှာ ဒဂုံစင်တာမှာပြုလုပ်ခဲ့တဲ့ Panasonic Beauty Concert  ပွဲမှာ ပထမဆုကို စတင်ရရှိခဲ့ပြီး အနုပညာလောကထဲကို စတင်ရောက်ရှိလာကာ ပြိုင်ပွဲတွေကတစ်ဆင့် သရုပ်ဆောင်တစ်ယောက်ရဲ့ဘ၀ကိုဖြတ်သန်းခဲ့သူကတော့ မယ်လိုဒီပါ။ အနုပညာလောကထဲမှာ ဆယ်စုနှစ်နီးပါးဖြတ်သန်းပြီးတဲ့ အချိန်မှာ ထာဝရအလင်းတန်းများ ဇာတ်ကားနဲ့အမျိုးသမီးဇာတ်ဆောင်ဆုကို ထိုက်တန်စွာ ရရှိခဲ့ပါတယ်။ အကယ်ဒမီရပြီး မကြာမှီမှာပဲ အိမ်ထောင်ပြုသွားခဲ့တဲ့ သူမက လက်ရှိအိမ်ထောင်သက် နှစ်နှစ်နီးပါး ရှိပြီဖြစ်ပြီး သားဦးလေးရတနာလေး ရရှိခဲ့တာ တစ်နှစ်ကျော်ပြည့်တဲ့ အချိန်မှာတော့ အနုပညာလောကထဲကို သောင်းတိုက်ကကြားရစေသားဇာတ်ကားကြီးနဲ့ပြန်လည်ဝင်ရောက်လာတော့မှာမို့ သူမနဲ့တွေ့ဆုံခိုက်မှာသွားရောက်မေးမြန်းဖြစ်သမျှက

-ရုပ်ရှင်ပြန်ရိုက်တော့မယ်လို့ သိရပါတယ်။ အဲ့ဒီအကြောင်းလေးကို အရင်ဆုံးပြောပြပေးပါဦး။

သောင်းတိုက်ကကြားရစေသားတဲ့။ အဓိကက ဆရာဦးထွန်းအောင်ဇော်ပေါ့။ မျိုးမျိုးကလဲ အရင်ကတည်းက ပြန်ရိုက်ချင်ပါတယ်။ ဒါပေမဲ့လဲ ကိုယ့်ခန္ဓာကိုယ်အချိုးအစားကြောင့်ရယ် အရမ်းဝနေတာကြောင့်ရယ်ကြောင့် ဒွိဟတွေဖြစ်နေခဲ့တယ်ပေါ့။ သားသားကိုယ်ဝန်နေစေ့လစေ့မှာ ၁၈၁ ပေါင်၊ မွေးပြီးတဲ့အချိန်မှာ ၁၇၀ကျော်ကျန်သေးတယ်။ အဲ့ဒီတော့ အရမ်းဝနေတယ်ပေါ့နော်။ ပြီးတော့သားကိုလဲထိန်းနေရတဲ့အခါကျတော့ မရိုက်ဖြစ်ဘူး။ သူ့ကိုအချိန်ပေးနေတာကြောင့်လဲပါတယ်။ ဆရာမခေါ်ထားပေမဲ့ သားကိုမျိုးကိုယ်တိုင်ပဲအစစအရာရာလုပ်ပေးဖြစ်တယ်။ အခုချိန်ထိလဲမျိုးနဲ့ပဲအိပ်တာဆိုတော့ မရိုက်ဖြစ်ဘူး။ ဆရာဦးထွန်းအောင်ဇော်ကလဲ မျိုးပြန်မရိုက်ဘူးပဲထင်တာ၊ ဒါပေမဲ့ မျိုးအမေနဲ့လဲသူကအဆက်အသွယ်ရှိတယ်။ အမေကလဲမရိုက်တော့ဘူးထင်တယ်ဆိုပြီး ပြောထားတော့ ကြားထဲမှာဆရာ ပြန်ဆက်သွယ်မှန်းလဲ မသိဘူး။ ဒါပေမဲ့ မျိုးကပြန်ရိုက်မယ်ဆိုပြီး ပြောလိုက်တဲ့အချိန်မှာ သူကဖုန်းဆက်လာတယ်။ သမီးတကယ်ပြန်ရိုက်မှာလားဆိုတော့ ရိုက်မယ်လို့။ အလုပ်ကလဲ ကလေးထိန်းတဲ့အလုပ်ပဲ ရှိတာဆိုတော့ ကိုယ့်အလုပ်လေးကိုပြန်လုပ်ချင်တယ်။ ပြန်ရိုက်ချင်တယ်ပေါ့။ အဲ့ဒီတော့ ဆရာကလဲ ရိုက်မယ်ဆိုပြီးရိုက်ဖြစ်သွားတာပါ။ အဓိကကတော့ဆရာ့ရဲ့ကျေးဇူးကြောင့်ပါ။

-အဲ့ဒီကားလေးကို ဘယ်နေ့လောက်စရိုက်ဖြစ်မလဲ။

သူက ၇ရက်နေ့စရိုက်မယ်။ ဒါပေမဲ့မျိုးက ၅ရက်နေ့လောက် ဒီကထွက်မယ်။ အဲ့ဒီထဲမှာ မျိုးက ကရင်အမျိုးသမီးတစ်ယောက်ရဲ့ ကာရိုက်တာပဲပေါ့။

-သားသားလေးကို ဒီမှာပဲထားခဲ့မလား။ ဟိုကိုခေါ်သွားဖြစ်မလား။

ခေါ်သွားမှာပါ။ ဆရာကများသောအားဖြင့် မန္တလေးဆိုပေမဲ့ ၀က်နတ်ချောင်းတို့၊ ရွှေစာရံတို့မှာရိုက်တာများတော့ အခက်အခဲမရှိဘူး။ နေတာကတော့ မန္တလေးမှာပဲနေမယ်။ သားသားပါမဲ့အတွက်သူစားဖို့သူ့အတွက်ကြည့်ပြီးဟိုတယ်ကိုလဲမီးဖိုပါတဲ့ဟာပဲယူထားတယ်။ ချက်ပြုတ်ကျွေးလို့ရအောင်လို့လေ။ ဘာလို့လဲဆိုတော့ သားသားနဲ့မျိုးနဲ့ကတစ်ခါမှခွဲမအိပ်ဖူးဘူးဆိုတော့ တတ်နိုင်သလောက်ခေါ်သွားလို့ရသလောက်နေရာတွေကိုတော့ အကောင်းဆုံးစီစဉ်ပြီးခေါ်သွားမယ်။ ကိုယ့်ဟာကိုယ်ကတော့ ဘယ်မှာနေနေရတယ်။ ဒါပေမဲ့သားအဆင်ပြေအောင်လို့မျိုး မန္တလေး ဆီဒိုးနားမှာပဲနေမယ်လို့ဆုံးဖြတ်လိုက်တယ်။ အဲ့ဒီမှာရေကူးကန်လဲပါတယ်။ Gym လဲရှိတော့ မျိုးနဲ့လဲအဆင်ပြေတယ်။ ဆီဒိုးနားက ၀င်းနဲ့ကားပါကင်နဲ့ဆိုတာ့ ကျယ်လဲကျယ်တယ်။ သူ့အတွက်လဲကြည့်ရတာပေါ့နော်။ ပြီးတော့ အဲ့ဒီကအစ်မတွေနဲ့လဲ ခင်တဲ့အတွက်သူ့ကိုစိတ်ချတယ်။ မီးဖိုချောင်လဲပါတယ်ဆိုတော့ အဲ့ဒီမှာပဲတည်းမယ်။ နေ့ခင်းဖက်ထားခဲ့လို့အဆင်ပြေတယ်။ နီးရင်တော့ခေါ်သွားတယ်။ သိပ်ဝေးရင်တော့ မခေါ်ဘူးပေါ့။ အခန်းထဲမှာပဲထားခဲ့မယ်။

-သားသားလေးကရော ဘယ်လောက်ရှိသွားပြီလဲ။ ကားတွေမရိုက်တာရော ဘယ်လောက်ကြာသွားပြီလဲ။

သားသားက တစ်နှစ်လေးလရှိပြီ။ မျိုးကားမရိုက်တာ တော်တော်ကြာသွားတယ်။ အိမ်ထောင်မပြုခင်က ရီမြင့်ကားတစ်ကားရိုက်တယ်။ ကောင်းပြည့်နဲ့တစ်ကားရိုက်တယ်။ ပြီးတော့လုံးဝဆက်မရိုက်ဖြစ်တော့တာ သုံးနှစ်နီးပါးကြာသွားတယ်။

-မရိုက်တာ သုံးနှစ်ကြာမှ ပြန်ရိုက်ရမဲ့ အခုကားကြီးအတွက်စိုးရိမ်တာမျိုးရော ဖြစ်မိလား။

စိုးတော့မစိုးရိမ်ဘူး။ အဓိကက ဆရာနဲ့မို့လို့လဲမစိုးရိမ်တာဖြစ်မယ်။ ဆရာကစိတ်ရှည်တယ်။ သူကတပည့်တွေအပေါ်မှာသားသမီးလိုပဲ။ သူမကြိုက်မချင်းခိုင်းပေမဲ့ မျိုးကလဲ ဘယ်တော့မှမညည်းညူတတ်ဘူး။ သိပ်ပြီးတော့စိုးရိမ်ပူပန်တာမျိုးမရှိဘူး။ ပျော်ပြီးစိတ်လှုပ်ရှားတာပဲရှိပါတယ်။ ဘာလို့လဲဆိုတော့ အသက်အရွယ်ကြောင့်လဲဖြစ်မယ်ထင်တယ်။ ငယ်ငယ်တုန်းကတော့ ယောက်ယတ်ခတ်ခဲ့ဖူးတယ်။ စိတ်ပူခဲ့တယ်။ အခုတော့အဲ့ဒီလောက်ကြီး စိတ်မပူဘူး။ ပြန်ရိုက်ရမှာမို့လို့အရမ်းတော့ပျော်နေပါတယ်။

-သားလေးကလဲ တစ်နှစ်ကျော်ပြီဆိုတော့ နောက်ထပ်ရင်သွေးယူဖို့ရောအစီအစဉ်ရှိဦးမလား။

အရင်တုန်းကတော့ ဆင်ဖမ်းမယ်။ ကျားဖမ်းမယ်ပေါ့။ သုံးယောက်ယူမယ်။ လေးယောက်ယူမယ်ပေါ့။ အခုတော့ ခွဲမွေးတာဆိုတော့ သုံးယောက်ပဲယူလို့ရမယ်။ မျိုးကတော့ ပွင့်ပွင့်လင်းလင်းပဲပြောတတ်တယ်။ ကလေးမွေးတဲ့အခါ ရုပ်ရှင်ထဲကလို မလွယ်ကူဘူး။ ကလေးမြင်တဲ့အခါ အမောပြေသွားတယ် ဘာညာအဲ့ဒီလိုလဲ မျိုးမခံစားမိဘူး။ ကလေးမွေးရတာကို အရမ်းကြောက်တယ်။ မျိုးမှာသွေးတိုးမရှိဘူး။ ဒါပေမဲ့ ခွဲခန်းထဲမှာ ပရက်ရှာတက်တယ်။ ကြောက်ပြီးတော့ ဖြစ်တာပေါ့။ မခွဲခင်ညမှာ သူများတွေ ဗိုက်နာတာကိုမြင်ပြီး အရမ်းကြောက်သွားတယ်။ ဒါပေမဲ့မွေးတဲ့အချိန်မှာလဲ ကြောက်တာရော ရှက်တာရော ကြောင့် သွေးတိုးတယ်။ တကယ်သားကို ထွက်လာတဲ့အချိန်မှာ ဘယ်သူမှအန္တရယ်မရှိတော့ဘူးဆိုတဲ့အသိပဲ ရှိတယ်။ ဘာမှသိပ်စိတ်မလှုပ်ရှားမိဘူး။ သူများတွေဆိုပင်ပန်းပြီးအိပ်သွားတယ်တဲ့။ မျိုးအဲ့ဒီတစ်နေ့လုံးရော တစ်ညလုံးရောမအိပ်ဘူး။ သားသားကအရမ်းလိမ္မာတယ်။ အရမ်းလဲချစ်ဖို့ကောင်းတယ်။ အခုဆိုရင်တော့ ခွဲလဲမခွဲအိပ်နိုင်ဘူး။ မွေးကာစတုန်းကတော့ မြင်မြင်ချင်း ရုပ်ရှင်ကားထဲကလို မဖြစ်ဘူး။ သူများတွေတော့ဖြစ်မှာပေါ့။ မျိုးကမဖြစ်ဘူး။ ဗိုက်ကြီးကခွဲထားတော့ ချုပ်ရိုးချုပ်နေတဲ့အချိန်အရမ်းစိတ်လှုပ်ရှားတယ်။ အရမ်းလဲကြောက်တယ်။ ပထမကသုံးယောက်မွေးပြီးတော့ မယူတော့ဘူးတောင်ဖြစ်သွားတာ ဒါပေမဲ့ အခုကျတော့လဲ သားကိုကြည့်ပြီးနောက်တစ်ယောက်လောက်တော့ထပ်ယူဖြစ်မယ်။ အခုတော့မဟုတ်ဘူး။ အချိန်ယူဦးမှာပေါ့။ တခြားမိခင်တွေတော့မသိဘူး။ အများကြီးမွေးပြီးစောင့်ရှောက်နိုင်တဲ့သူတွေကိုမျိုးတကယ်အားကျတယ်။ တကယ်ကလေးတစ်ယောက်မွေးရတာစိတ်ကအရမ်းဂယောက်ဂယက်ဖြစ်တယ်။ မျိုးကဆရာမခေါ်ထားပေမဲ့ ကိုယ်ကိုတိုင်ရေချိုးပေးတယ်။ ကိုယ်ကိုတိုင်ထမင်းကျွေးတယ်။ မျိုးကစိတ်မချဘူး။ ကလေးထိန်းတာကိုလဲ ဆရာမဆီကပဲသင်လိုက်တာ၊ ကိုယ့်ဟာကိုယ်ပဲအကုန်လုပ်ပေးဖြစ်တယ်။ နောက်တစ်ယောက်ကိုအခုယူလိုက်ရင် သူသိပ်ပြီးတီတီတာတာလုပ်ရမှာမဟုတ်တော့ဘူး။ ပိုဆိုးတာက သူကအမေနဲ့ပဲအိပ်တယ်။ မျိုးဗိုက်ကြီးရင်သူနဲ့တူတူအိပ်လို့မရတော့ဘူး။ ဘာလို့လဲဆိုတော့ သူကတစ်ပတ်လည်ပြီးအိပ်တာဆိုတော့ ဗိုက်ကြီးရင်သူနဲ့ခွဲအိပ်ရမှာဆိုတော့ လောလောဆယ်မယူသေးဘူး။ ဒါပေမဲ့ နောက်တစ်ယောက်လောက်တော့ ယူဖြစ်မှာပါ။

-သားလေးအကြောင်းကိုလဲပြောပြပေးပါဦး။

သားကအရမ်းလိမ္မာတယ်။ အရင်ကမျိုးအပြင်သွားရင် သူကစိတ်ကောက်တယ်။ ကိုယ်ကလဲ လှချင်ပြီလေ။ အဲ့ဒီတော့ Spa သွားတယ်။ Gym သွားတယ်။ အဲ့ဒီလိုဆိုသူက စိတ်ကောက်တယ်။ သွားပြီးပြန်လာရင် သူကမခေါ်ဘူး။ ပိစိလေးတုန်းကဆို တစ်ခါစိတ်ကောက်ရင် သုံးနာရီလောက်ကြာတယ်။ အဲ့ဒီတော့ ကိုယ်ကလဲ သူ့လိုပဲစိတ်ကောက်လိုက်တယ်။ သားမေမေကိုမခေါ်ရင်မေမေလဲမခေါ်ဘူးဆိုပြီး မသိချင်ယောင်ဆောင်လိုက်တယ်။ အဲ့ဒီတော့သူက စိတ်မဆိုးတော့ဘူး။ မျိုးပြန်လာပြီဆိုပြုံးပြတယ်။ လိုက်လျောညီထွေနေတတ်တယ်ပေါ့။ အဲ့ဒါကိုကြည့်ပြီး စိတ်မကောင်းဘူး။ ပြီးတော့ ကားလဲပြန်ရိုက်ချင်တယ်။ အခုကယောကျာ်းလုပ်စာ ထိုင်စားနေတာဆိုတော့ ကိုယ်ကကိုယ့်ဟာကိုယ် ရုန်းကန်ခဲ့ရတဲ့သူဆိုတော့ ထိုင်စားရတဲ့အရသာကို သိပ်မကြိုက်ဘူး။ ပြီးတော့ကိုယ့်ငွေနဲ့ကိုယ်သားကို ၀ယ်ပေးချင်တယ်။ ကိုယ့်မိဘကိုပေးချင်သေးတယ်။ ပြီးတော့ ယောကျာ်းကိုလဲ Surprise လုပ်ပေးချင်သေးတယ်။ အခုချိန်ထိလဲ မျိုးဖက်တီးကြီးဖြစ်သွားတာတောင်ချစ်နေတဲ့ ပရိသတ်တွေကလဲရှိတော့ မျိုးပြန်ရိုက်ချင်တယ်။ အရင်ကလဲ စူပါတန်းဝင်မဟုတ်တော့ အခုချိန်မှာ ဘယ်လောက်ပဲ အားပေးအားပေးပြန်ရိုက်ရတာ ရိုက်ပျော်ပါတယ်။ ကိုယ်လဲလုပ်ချင်တယ်။ သူတို့ကလဲကြိုဆိုတယ်ဆိုတော့ အဓိကက သားလေးကြောင့်လဲ ပါပါတယ်။ မျိုးသရုပ်ဆောင်တာကိုလဲ သူ့ကိုပြန်မြင်စေချင်သေးတယ်လေ။ ဒါကြောင့်မို့ပြန်လဲရိုက်ဖြစ်တယ်။ ကလေးလဲ ထပ်ယူချင်သေးတယ်။ ဘယ်အချိန်လဲဆိုတာ မှန်းလို့မရသေးတာပါ။

-ကားပြန်ရိုက်တော့မယ်ဆိုတော့ အစ်မ အမျိုးသားကရော ဘာပြောသေးလဲ။

သူကတော့ခွင့်ပြုတယ်။ သူအစကတည်းက မျိုးပျော်တယ်ဆိုလုပ် မျိုးရှုတင်တွေဆို သူလိုက်ဖူးတယ်။ မျိုးကညည်းတယ်ပေါ့။ အဲ့ဒါဆိုဘာလို့လုပ်လဲပေါ့။ မျိုးမပျော်ရင်၊ စိတ်မချမ်းသာရင်မလုပ်နဲ့။ မျိုးပျော်ရင် စိတ်ချမ်းသာရင်လုပ်ဆိုတော့ သူနဲ့က ကားရိုက်နဲ့ပတ်သက်ပြီး ငြိစရာမရှိဘူး။

-သားသားနဲ့ပတ်သက်ပြီးထူးခြားတာရောဘာများရှိလဲ။

သားသားက ဘုရားတရားအရမ်းမြဲတယ်။ ဦးတော်ဦးတော် လုပ်တာက တားတောင်တားယူရတယ်။ သူကအိပ်ရာနိုးရင် ဘုရားစင်နားသွားပြီး ဦးတော်လုပ်တယ်။ နေပြည်တော်က အဖွားကသင်ပေးထားတဲ့အခါကျတော့ ဦးတော်လိုက်လုပ်တယ်။ နေပြည်တော်မှာဆို ဘုရားစင်ရှေ့မှာ ဦးတော်လုပ်တယ်။ ပြီးတော့ သူ့ကိုချီခိုင်းတယ်။ ပြီးရင် ဘုရားမျက်နှာတော်ကို တစ်ခါဦးတော်ထပ်လုပ်တယ်။ သားသားက ဘယ်သူခေါ်ခေါ်လိုက်တယ်။ အားလုံးကိုချစ်တယ်။ သူကိုယ်တိုင်လဲ အချစ်ခံချင်တယ်။ သားသားက အထွေအထူး ထိန်းစရာမလိုဘူး။ သူ့ကြောင့်မျိုးပြောင်းလဲတာတွေရှိတယ်။ သူကချွဲတယ်။ ငိုလဲမငိုဘူး။ ဂျီလဲမကျဘူး။ ရစ်လဲမရစ်ဘူး။ မျိုးကအဲ့ဒါကြောင့်သူ့ကို ဘုန်းကြီးဝတ်ပေးချင်တယ်လို့။ ကြီးရင်တော့မသိဘူး။ အခုကတော့ တော်တော်ကိုအေးတယ်။

-အနုပညာနဲ့ပတ်သက်ပြီးတော့ရော သားသားက၀ါသနာပါလား။

ပါတယ်လို့ပြောရမယ်။ မျိုးကဓာတ်ပုံရိုက်ရင်ဝတ်စုံများရင်ညီးလာတယ်။ သိပ်မရိုက်ချင်ဘူး။ သားသားကအဲ့ဒီလိုမဟုတ်ဘူး။ ဘန်ကောက်မှာတစ်ခါ၊ ဒီမှာတစ်ခါသူကြော်ငြာရိုက်ဖူးတယ်။ အကျီင်္သုံးစုံလဲရတာကို တစ်ချက်မညီးဘူး။ သူ့အဖေ အရမ်းစိတ်ညစ်နေတာတစ်ခုက မှန်ကြည့်ပြီး အိုက်တင်လုပ်တာပဲ။ သူ့ဟာသူမျိုးစုံလုပ်နေတယ်။ အဲ့ဒါကို စိတ်ရှုပ်နေတယ်။ ဓာတ်ပုံရိုက်တော့လဲ ကင်မရာကိုသူကြည့်တယ်။ ဓာတ်ပုံရိုက်ရတာကိုလဲသူပျော်တယ်။ မျိုးကတော့ သူဖြစ်ချင်တာကို ဦးစားပေးမှာပါ။ အကောင်းအဆိုးကိုညွှန်ပြမယ်။ မျိုးကတော့သူ့ကိုသာသနာ့ဘောင်ထဲမှာပဲအေးအေးချမ်းချမ်းနေစေချင်တယ်။

-ကားကြီးစရိုက်မယ်ဆိုတော့ ဗီဒီယိုအနေနဲ့ရော ရိုက်ဖြစ်ဦးမလား။ တွေ့ရဦးမလား။

အရှင်းဆုံးပြောရရင်တော့ကွယ် ကိုယ့်ကိုလာမခေါ်လို့မရိုက်ရတဲ့သဘောပါပဲ။ အခုက သရုပ်ဆောင်တွေလဲ အရမ်းများတယ်။ ကိုယ်တွေကသာ အသက်နှစ်ဆယ့်ငါးလောက်မှ ကားစရိုက်တာ အခုကလေးတွေက ငယ်ငယ်လေးတွေနဲ့ကားစရိုက်ကြတယ်။ သရုပ်ဆောင် အရမ်းတော်ကြတယ်။ ပါရမီရှင်လို့တောင်ပြောလို့ရတယ်။ မျိုးဆိုရင် စရိုက်တုန်းက အိုက်တင်လဲမကောင်းဘူး။ လက်ဆို ဘယ်နားထားရမှန်းမသိဘူး။ သရုပ်ဆောင်တွေလဲ အများကြီးထွက်တယ်။ တော်လဲတော်တယ်။ ငယ်ဂုဏ်လဲရှိတဲ့အတွက် အခုချိန်မှာပြန်ရိုက်ရတာ လွယ်တော့မလွယ်ဘူး။ ကိုယ့်နေရာလေးနဲ့ကိုယ်ကတော့ မျိုးပျော်ပါတယ်။ ဗီဒီယိုကလဲ ကိုယ်နဲ့ကိုက်ညီတဲ့ ဇာတ်ကောင်ရှိရင်တော့လဲ ခေါ်မှာပေါ့နော်။ ကိုယ်ကအစကတည်းက အရမ်းသရုပ်ဆောင်ကောင်းတဲ့အထဲလဲ မပါခဲ့ဘူး။ အဲ့ဒီတော့ပြန်ရိုက်မယ်ဆိုတော့လဲ အုံးအုံးကျက်ကျက်သိပ်မဖြစ်ဘူးပေါ့ကွယ်။ စူပါစတားလဲမဖြစ်ခဲ့သလို သရုပ်ဆောင်အရမ်းပြောင်မြောက်တဲ့အထဲမှာလဲ မပါခဲ့ပါဘူး။

-အရမ်းဝတဲ့အချိန်မှာ ခန္ဓာကိုယ်ကို ဘယ်လိုထိန်းသိမ်းဖြစ်လဲ။

မျိုးဝတုန်းကဆို စိတ်ဂယောက်ဂယက်ဖြစ်တယ်။ မျိုးလှချင်တယ်။ ဒါပေမဲ့ အဲ့ဒါက သူများကြည့်ဖို့မဟုတ်ဘူး။ ကိုယ့်ယောကျာ်းသဘောကျဖို့မဟုတ်ဘူး။ ကိုယ့်ကိုယ်ကို သဘောကျဖို့လှချင်တာ၊ အကျီင်္တစ်ထပ်ချုပ်လိုက်ရင် အကျီင်္ကကြီးနေတယ်။ ဒါပေမဲ့ ၀တ်လိုက်ရင် ကိုယ်နဲ့တောင်ကျပ်နေတယ်။ အဲ့ဒီတော့ မျိုးအစားလျှော့တယ်။ ရေရှည်မှာတော့ အစားမလျှော့နိုင်ဘူး။ အဲ့ဒီတော့ ကစားဖို့ဆုံးဖြတ်လိုက်တယ်။ အိမ်မှာယောဂခေါ်ကစားတယ်။ Gym မှာလဲ သွားကစားတယ်။ မျိုးရဲ့အားသာချက်က အသားကုန် မကစားဘူး။ မျိုးပြေးတယ်။ သူများတွေဆိုနာရီဝက်၊ တစ်နာရီပေါ့။ မျိုးမလုပ်ဘူး။ Gym ကိုသွားသွားချင်း နှစ်မိနစ်လမ်းလျှောက်တယ်။ တစ်မိနစ်ပြေးတယ်။ အဲ့ဒီလောက်ပဲ။ ကိုယ့်ဝိတ်ကိုမနိုင်ဘူးလေ။ တချို့သိပ်ဝတဲ့သူတွေဆို ၀လို့ဆိုပြီး gym မသွားချင်ကြဘူး။ ဒါပေမဲ့ အဲ့ဒါကမဆိုင်ဘူးလေ။ ကျန်းမာရေးအတွက်ကိုယ်လှဖို့အတွက်ဆော့တာဆိုတော့ ဘာမှစိတ်အားငယ်စရာမလိုဘူး။ အလေးလဲ နည်းနည်းပဲကစားတယ်။ belly ရိုက်တယ်။ PT ကလဲမိန်းကလေးဆိုတော့ အားလုံးပြောပြလို့ရတယ်။ ပြီးတော့ မျိုးကော်ဖီသောက်တယ်။ Equal ကော်ဖီတော့သောက်တယ်။ အဲ့ဒါက သူတို့စပွန်ဆာပေးထားတာမဟုတ်ဘူး။ သူတို့နဲ့လဲမျိုးမသိဘူး။ အဲ့ဒီကော်ဖီကို တနေ့အများဆုံး သုံးခွက်သောက်တယ်။ အနည်းဆုံးနှစ်ခွက်ပေါ့။ မနက်စာစားတယ်။ နေ့လည်စာကို များများစားတယ်။ ညစာမစားဘူး။ ထမင်းကို တစ်ပန်းကန်၆စွန်းစာလောက်ကို အသီးအရွက်များများစားတယ်။ ၀က်သားကိုရှောင်သင့်တယ်။ ကြက်သား၊ အမဲသားစားတယ်။ အဆီအနှစ်၊ အစိမ့်ရှောင်တယ်။ အသီးအရွက်နဲ့အပြုတ်ရည်ကို စားတယ်။ မျိုးအိမ်မှာမအိပ်ခင် ဂျင်းနဲ့သံပုရာသီးနဲ့ပျားရည်နဲ့ကိုဖျော်သောက်တယ်။ ကျန်တာကတော့ ကလေးထိန်းပေါ့။ အဲ့ဒီလောက်ပဲလုပ်ဖြစ်တယ်။ ခန္ဓာကိုယ်ရော၊ စိတ်ရောအနားမပေးတာကောင်းတယ်။ နောက်တစ်ခုက Nu Skin က လဲကောင်းတယ်။ အဲ့ဒါလဲလုပ်ဖြစ်တယ်။ ပိန်သွားတဲ့အခါမှာလုပ်တာကတော့ အဲ့ဒါတွေပါပဲ။

-အခုချိန်ထိမျိုးရဲ့ဇာတ်ကားတွေနဲ့ မျိုးရဲ့သားသားလေးကို အားပေးနေကြတဲ့ ပရိသတ်တွေကိုရော ဘာများပြောချင်သေးလဲ။

ကျေးဇူးတင်ပါတယ်။ ၀မ်းလဲဝမ်းသာပါတယ်။ မျိုးကိုနားလည်ပေးတဲ့အတွက်ပေါ့။ တခါတလေမျိုးကို ဘယ်သူမှနားလည်မပေးနိုင်ဘူးလို့ထင်တဲ့ အချိန်တွေတောင်ရှိခဲ့တယ်။ အဲ့ဒီလိုအချိန်မျိုးမှာအရမ်းလဲအားငယ်ခဲ့ရတယ်။ အရမ်းလဲငိုခဲ့ရတယ်။ အကယ်ဒမီရတော့လဲ ဖေ့စ်ဘုတ်မှာ အပြောခံခဲ့ရတုန်းကလဲ ခဏလောက်ပျောက်သွားချင်ခဲ့မိတယ်။ စိတ်ပိုင်းဆိုင်ရာလဲတော်တော်လေး ထိခိုက်သွားတယ်။ ဘယ်တော့မှပြန်မရိုက်တော့ဘူးလို့တောင်ဖြစ်ခဲ့တာပေါ့။ အဲ့ဒီတော့ အခုကတော့ တော်တော်နေလို့ကောင်းသွားပါပြီ။ အလွန်အကျွံတွေလဲ မတွေးမိတော့ဘူး။ ဖေ့စ်ဘုတ်မှာ တင်လိုက်တဲ့အခါတစ်ရာမှာ နှစ်ယောက်လောက်ကပဲ ပြန်ရိုက်လို့ပြောရင်တောင် ၀မ်းသာနေတာ။ အဓိကကတော့ သားကိုချစ်လို့မျိုးကိုချစ်တာပေါ့။ မျိုးသိရသလောက် အမေကိုချစ်လို့နောက်ဆက်တွဲကိုချစ်ကြတာ၊ မျိုးကကျတော့ သားကိုချစ်လို့မျိုးကိုချစ်ကြတာပါ။ သားကိုချစ်တာနဲ့တင်မျိုးအတွက်အရမ်းပြည့်စုံသွားပါပြီ။ ကျေးဇူးတင်ပါတယ်လို့ပြောချင်ပါတယ်။

0 Shares
Trend Myanmar Team မှ စီစဉ်တင်ဆက်သော trend.com.mm တွင် ဖော်ပြပါရှိသော သတင်းများ၊ သတင်းဆောင်းပါးများ၊ ဘာသာပြန်ဆောင်းပါးများကို မည်သည့် facebook စာမျက်နှာ ၊ website များတွင်မဆို ပြန်လည်ကူးယူ ဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.