အမေနဲ့ညီလေးကို ပြန်ကြည့်ဖြစ်နေတဲ့ ရဲလေးက အဖေမရှိတော့တဲ့ အတွက်အိမ်ထောင်ဦးစီးတစ်ယောက်ဖြစ်နေကြောင်းပြောပြလာ

13650634_1769737963285114_2086758459_n.jpg

၂၀၁၆မှာ အနုပညာလောကအပြင် ဂီတလောကနဲ့ အားပေးနေဆဲ ပရိသတ်တွေနဲ့ တစ်သားတည်းဖြစ်လာသူကတော့ ရဲလေးပါ။ ရဲလေးဟာ လက်ရှိမှာ သရုပ်ဆောင်အလုပ်ကို ပိုမို Feel လာနေတဲ့အတွက် ဆက်တိုက်ဆိုသလို ဇာတ်ကားတွေနဲ့ဇာတ်လမ်းတွဲများရိုက်ကူးဖြစ်နေသလို ဂီတပိုင်းနဲ့ပတ်သက်ပြီးတော့တစ်ဖက်ကလဲ တစ်နှစ်ကို တစ်ခွေထွက်နိုင်အောင်ကြိုးစားနေကြောင်းပြောပြလာပါတယ်။ ဇာတ်ကားတွေကို ပို Feel လာနေပေမဲ့ သူချစ်တဲ့ သီချင်းတွေကိုတော့ ဘယ်တော့မှ ပရိသတ်နဲ့အဆက်ပြတ်မသွားစေရဘူးလို့ပြောပြလာတဲ့ ရဲလေးရဲ့ လက်ရှိအနုပညာခရီးလမ်းကို ပြေးကြည့်မိတဲ့အခါ  

-အခုလတ်တလော ဘာတွေလုပ်ဖြစ်နေလဲ။

ဟိုတလောကတော့ ဒါရိုက်တာဦးခင်စောမျိုးနဲ့တစ်ကွင်းလုံးဆူလို့ညံဆိုတဲ့ ဟာသရုပ်ရှင်ကားကြီးရိုက်တယ်။ အဲ့ဒါပြီးတော့ ကိုမြင့်မြတ်တို့နဲ့ဇွတ်ကျားဆိုတဲ့ ညီအစ်ကို လေးယောက်ပါဝင်တဲ့ ဟာသကားကြီးတစ်ကားထပ်ရိုက်တယ်။ ဒီကားလေးပြီးရင်တော့ ဒီဇင်ဘာလောက်မှပဲ ကားတွေပြန်ရိုက်ဖြစ်တော့မယ်။ အဲ့ဒါကလဲ ထွန်းထွန်းတို့နဲ့အတွဲပါပဲ။ အခုလောလောဆယ်တော့ မရိုက်ဖြစ်သေးဘူး။ သီချင်းဖက်ကိုလုပ်ဖြစ်နေပါတယ်။

-ဂီတဖက်ကရော ဘာတွေလုပ်ဖြစ်နေလဲ။

သီချင်းဖက်ကို တောက်လျှောက်ပြန်လှည့်ဖြစ်နေတယ်။ ကြားထဲမှာလဲ နောက်ထွက်မဲ့အယ်လ်ဘမ်တွေအတွက်သီချင်းသစ်တွေသွင်းဖြစ်နေတယ်။ ဇူလိုင်၂၄မှာလွှင့်တော့မဲ့ နောက်ရွှေမိုးငွေမိုးသွန်းဖြိုးလို့ရွာဆိုတဲ့ ဇာတ်လမ်းတွဲလေးအတွက် Theme Song ကိုလဲဖန်တီးနေတယ်။ သွင်းဖို့ရှိတယ်ပေါ့။

-သရုပ်ဆောင်ဖက်ကို ပြန်လည်လုပ်ကိုင်လာတာကို အားပေးသလို ဂီတဖက်ကိုလဲ ပြန်လည်လုပ်ကိုင်စေချင်တာမျိုးတွေလဲတွေ့နေရတယ်လေ။ သူတို့အတွက်ကျတော့ရော အစ်ကို့အနေနဲ့ဘယ်လိုဆက်ပြီးဖန်တီးပေးသွားမလဲ။

ကျွန်တော်ဒီနှစ်ထဲမှာဆိုရင် သရုပ်ဆောင်ပိုင်းကိုပိုပြီးခပ်စိတ်စိတ်လုပ်ဖြစ်တယ်။ ပရိသတ်အတွက်တော့ ဘာပဲပြောပြောတစ်မျိုးတစ်ဖုံအမြင်ဆန်းသွားမယ်လို့လဲထင်တယ်။ အရင်ကတော့ ဗီစီဒီလောက်ပဲသရုပ်ဆောင်ဖြစ်တယ်။ သရုပ်ဆောင်ပိုင်းနည်းတယ်။ အခုကတော့ ဗီဒီယိုတွေအပြင်ကားကြီးတွေပါ ပါတဲ့အတွက် ပရိသတ်အတွက်တော့ ပျော်စရာအစီအစဉ်လေးတွေဖြစ်တာပေါ့နော်။ သီချင်းတွေထွက်မယ်။ ရုပ်ရှင်ကားတွေရော ၊ ဗီဒီယိုတွေရော နောက်အငြိမ့်နဲ့ပတ်သက်ရင်လဲ နှင်းဆီကလဲ ရှင်သန်ခြင်းနှင်းဆီအနေနဲ့ကျွန်တော်တို့ငါးယောက်ဆုံတဲ့အချိန်မှာအောင်မြင်ခဲ့တယ်လေ။ နောက်နှင်းဆီအသစ်တွေလဲလာပါလိမ့်မယ်။ အားလုံးကတော့ ပျော်စရာကြီးပါ။ ၂၀၁၆ကစပြီး အလုပ်တွေကတော့ တောက်လျှောက်လုပ်ဖြစ်သွားမှာပါ။

-သရုပ်ဆောင်ပိုင်းနဲ့ဂီတပိုင်းဆိုရင် ဘယ်ဟာကိုပိုပြီး ပျော်မွေ့လဲ။

ကားရိုက်ပိုင်းကို ပြန်လုပ်တဲ့အချိန်မှာတော်တော်လေး Feel လာတယ်လို့ပြောလို့ရတယ်။ ခေါင်းဆောင်သရုပ်ဆောင်တဲ့ကားတွေအပြင်အတွဲတွေရော တစ်ခါတစ်လေကျရင် လဲရတဲ့နေရာကရသလို အခန်းနည်းတာများတာကို အဓိကမထားပဲနဲ့အကောင်းဆုံးသရုပ်ဆောင်တစ်ယောက်ဖြစ်အောင်ကြိုးစားဖြစ်တယ်။

-သီချင်းတွေရောရေးဖြစ်သေးလား။

ရေးဖြစ်ပါတယ်။ အခုဆို ကျွန်တော့အခွေအသစ်အတွက်သီချင်းတွေရေးဖြစ်နေတယ်။ နောက်ကြားထဲမှာအပ်ထားတဲ့ ရင်းနှီးတဲ့သူငယ်ချင်းတွေအတွက်လဲသီချင်းရေးပေးဖြစ်တယ်။ နောက်အဓိကကတော့ ပွင့်လင်းရာသီမှာကျွန်တော့်ရဲ့တစ်ကိုယ်တော်အခွေထပ်ထွက်မယ်။ တစ်နှစ်ကိုတစ်ခွေထွက်သွားမယ်။ ရှိုးတွေလဲတစ်နှစ်ကိုတစ်ခါတော့ပုံမှန်လုပ်သွားမယ်။ ရန်ကုန်၊ မန္တလေးအဆင်ပြေသလိုပဲ။ လုပ်ဖြစ်သွားမယ်။ ဘာလို့လဲဆိုတော့ လုပ်နိုင်တုန်းလုပ်ရတာလေ။ နောင်အသက်ကြီးသွားရင်လုပ်လို့မကောင်းတော့ဘူး။ အဲ့ဒါကြောင့်လုပ်လို့ရတဲ့အရွယ်၊ လုပ်လို့ရတဲ့အချိန်မှာအကောင်းဆုံးလုပ်သွားမယ်။ အရုပ်ရော၊ အသံရောပေါ့။

-ဇာတ်ကားတွေတော်တော်များများမှာဆက်တိုက်ဆိုသလို ပါဝင်သရုပ်ဆောင်ဖြစ်နေတာတွေ့ရတယ်နော်။

လူ့စိတ်ကတစ်ခါတစ်လေတော်တော်လေးကြောက်ဖို့ကောင်းပါတယ်။ လုပ်ချင်ကိုင်ချင်စိတ်တွေတစ်ခါတစ်လေမှာပျောက်ဆုံးနေသလို တစ်ခါတစ်လေကျတော့လဲ လုပ်ချင်ကိုင်ချင်စိတ်တွေတစ်အားပြင်းထန်နေတဲ့အခါမျိုးတွေလဲရှိတယ်။ အဲ့ဒါကြောင့်ဒီနောက်ပိုင်းမှာဇာတ်ကားတွေပိုရိုက်ဖြစ်တယ်။ ရုပ်ရှင်ကြည့်ရတာကိုလဲ Feel ဖြစ်တယ်။ ပရိသတ်ကိုခပ်ဆန်းဆန်းလေးတွေတင်ဆက်ချင်တဲ့အတွက်၊ သရုပ်ဆောင်ပိုင်းကိုလဲ ပို Feel လာနေတဲ့အတွက် ပါ။ သီချင်းကတော့ ပြတ်သွားမှာမဟုတ်ပါဘူး။ သီချင်းကိုလဲကျွန်တော်အရမ်းချစ်တယ်။ အဲ့ဒါကြောင့်တစ်နှစ်တစ်ခွေတော့ပုံမှန်ထွက်သွားမှာပါ။ အဲ့ဒါကတော့ ကတိပေးပါတယ်။

-အခုနောက်ပိုင်းမှာထူးထူးခြားခြားပြောင်းလဲသွားတာမျိုးကိုယ့်ကိုကိုယ်ပြန်သုံးသပ်မိတာမျိုးရှိမလား။

ထွေထွေထူးထူးပြောင်းလဲသွားတာမျိုးတော့မရှိဘူး။ ပရိသတ်တွေအတွက်ပိုပြီးတော့ကြိုးစားရမယ်ဆိုတာတော့သိတယ်။ ပြီးတော့ ကိုယ့်ကိုကိုယ်ပြိုင်နေတာမျိုးရှိတယ်။ ၂၀၁၆ မှာဘာ လုပ်မလဲ၊ ၂၀၁၇ မှာဘာလုပ်မလဲ ၊ ၂၀၁၈မှာဘာလုပ်မလဲဆိုတဲ့ တစ်နေ့တစ်နေ့မှာကိုယ့်ကိုကိုယ်ပဲပြိုင်သွားပြီးတော့ အသစ်အဆန်းတွေကိုရှာဖွေလေ့ရှိပါတယ်။ ကိုယ့်အလုပ်ကို အကောင်းဆုံးလုပ်တယ်။ အာရုံသိပ်မများပါဘူး။

-အရင်ကဆို အိမ်ကို အရမ်းပြန်ကြည့်ခဲ့တဲ့သားတစ်ယောက်ပေါ့။ အနုပညာအလုပ်တွေလုပ်တယ်။ အဲ့ဒီကရတဲ့ အနုပညာကြေးနဲ့မိဘကိုပြန်သိတတ်တယ်ပေါ့။ အခုရော အရင်တိုင်းပဲလား။

ဟုတ်ပါတယ်။ အရင်ကပုံစံအတိုင်းပါပဲ။ ကျွန်တော့်မိဘတွေနဲ့ကျွန်တော်နေတယ်။ ကျွန်တော့ညီလေးနဲ့ပေါ့။ အစ်ကိုကတော့သူ့အိမ်ထောင်နဲ့သူဆိုတော့လေ။ အိမ်မှာတော့ ကျွန်တော်ကအိမ်ထောင်ဦးစီးသဘောမျိုးဖြစ်နေတာပေါ့။ အဖေကလဲမရှိတော့ဘူးဆိုတော့ ကျွန်တော်ပြန်ကြည့်ရမဲ့သူဆိုလို့ညီလေးနဲ့အမေပဲရှိပါတယ်။

-မိသားစုနဲ့ရော တစ်နေ့တာကို ဘယ်လိုကျော်ဖြတ်ဖြစ်လဲ။

အရင်ကလိုပဲ မိသားစုနဲ့ပျော်ပျော်ရွှင်ရွှင်နေဖြစ်တယ်။ အလုပ်တွေလဲလုပ်တယ်။ အမေချက်တဲ့ထမင်းလဲပုံမှန်စားဖြစ်တယ်။ နေ့တိုင်းလိုလိုပါပဲ။ မိသားစုနဲ့ပျော်ပျော်ရွှင်ရွှင်ပါပဲ။ ကျွန်တော့်အတွက်ကတော့ မိသားစုရယ်၊ ကျွန်တော့်ကိုချစ်တဲ့ပရိသတ်တွေရယ်၊ ကျွန်တော်ချစ်တဲ့အနုပညာရယ်က ကျွန်တော့ဘ၀မှာ အမြဲတမ်းအတူတူရှိနေမဲ့အရာတွေပါ။ သူတို့နဲ့ပဲ နေ့ရက်တွေကို ကျော်ဖြတ်မယ်လို့ပဲမျှော်လင့်ထားပါတယ်။

-Myanmar Idol မှာလဲ ဒိုင်လုပ်နေတယ်ဆိုတော့လေ နောက်ထပ်ပွဲတွေမှာရော ကမ်းလှမ်းလာရင်လုပ်ပေးဖြစ်ဦးမလား။

အခုလောလောဆယ်တော့ ဘာမှကမ်းလှမ်းလာတာမရှိသေးဘူး။ လာခဲ့ရင်လဲအားလုံးညှိနှိုင်းပြီးလုပ်ဆောင်သွားဖို့ပဲရှိပါတယ်။ ယတိပြတ်ငြင်းလိုက်တာတို့၊ ယတိပြတ်မလုပ်တာတို့မရှိပါဘူး။ အဓိကကတော့ကိုယ်နဲ့အဆင်ပြေမယ်ဆိုရင် Myanmar Idol မှမဟုတ်ပါဘူး။ တခြားဟာတွေလဲကျွန်တော်လက်ခံဖြစ်မှာပါ။

-တချို့အဆိုတော်တွေက ဒိုင်သိပ်မလုပ်ချင်ကြဘူး။ အငြင်းပွားမှုနဲ့ဝေဖန်မှုတွေလဲရှိတော့လေ။ အစ်ကို့အနေနဲ့ရော အဲ့ဒီအပေါ် ဘယ်လိုမြင်မိလဲ။

ကျွန်တော်ကဝေဖန်သံကို သိပ်ဂရုမစိုက်ဖြစ်ဘူး။ ဘာလို့လဲဆိုတော့ ဘာလုပ်လုပ်အကောင်းပြောတဲ့ခေတ်မဟုတ်တဲ့အတွက် ပရိသတ်ကိုအားလည်နေပါပြီ။ ခုနကပြောသလိုပဲ။ ကိုယ်နဲ့အဆင်ပြေရင်ကိုယ်လုပ်မယ်။ ကိုယ်နဲ့အဆင်မပြေရင်မလုပ်ဘူးဆိုတာ အဲ့ဒါပါပဲ။ ဘာပဲလုပ်လုပ်အကောင်းပြောခံရတာနည်းတဲ့အတွက် ပြီးတော့ ဒီခေတ်ကြီးကိုကအကောင်းပြောမခံရတာ ပိုများတဲ့အတွက်ကျွန်တော်တို့ကနားလည်ပေးပြီးသားပါ။စိတ်နေစိတ်ထားကနေတတ်နေပါပြီ။ ဝေဖန်သံနဲ့ပတ်သက်ပြီးတချို့တွေက ဘာမှနားမလည်ပဲဝေဖန်တာရှိသလို ၊ တချို့ကျတော့လဲ အတတ်ပညာရှင်တွေ ဝေဖန်တာမျိုးရှိတယ်။ အစုံပါပဲ။ ဒါပေမဲ့ အဲ့ဒါကို သိပ်ဂရုမစိုက်ဖြစ်ဘူး။ ကိုယ်လုပ်စရာရှိတာပဲလုပ်တယ်။ အဲ့ဒီလိုမျိုးစိတ်နဲ့သွားရင်တော့ လူတစ်ယောက်အောင်မြင်မှာပါပဲ။

-စိတ်ဖိစီးမှု၊ အဆင်မပြေမှုတွေနဲ့ကြုံတွေ့တဲ့အခါကိုယ့်စိတ်ကို ဘယ်လိုထားဖြစ်လဲ။

ပြောရရင် ကျွန်တော်ကစိတ်ကိုမညစ်တတ်တာ၊ ကိုယ့်အလုပ်တွေပဲဖိလုပ်တဲ့အတွက်စိတ်ညစ်ဖို့ကိုအချိန်မရှိတာ၊ ကျွန်တော့သတင်းမဟုတ်ကဟုတ်ကတွေလဲဖေ့စ်ဘုတ်လူမှုကွန်ယက်မှာအရင်တုန်းကကြေညာသလို ခုလဲကြေညာသလို နောက်လဲကြေညာနေဦးမှာပဲ။ အဆင့်မရှိတဲ့ Page တွေကတင်နေဦးမှာပဲ။ ဒါပေမဲ့နားလည်တတ်သွားပြီ။ ကိုယ့်မှာကအလုပ်တွေအများကြီးလုပ်စရာရှိတယ်။ သူတို့ဆေးထိုးတာလောက်ကို ခေါင်းထဲထည့်မနေနိုင်တော့ဘူး။ စိတ်ညစ်မခံနိုင်တော့ဘူး။ အဲ့ဒါကြောင့်ကျွန်တော့လိုလူမျိုးကို စိတ်ညစ်အောင်လာလုပ်လဲခြေကုန်လက်ပန်းကျသွားမှာပါ။ စိတ်ညစ်အောင်လာပြောနေလဲဂရုစိုက်မှာမဟုတ်ဘူး။ ကျွန်တော်ကအလုပ်ကိုပဲအကောင်းဆုံးလုပ်ပါတယ်။ ဆေးထိုးတာတွေ၊ ဝေဖန်မှုတွေကို ခေါင်းထဲလဲသိပ်မထည့်တတ်ပါဘူး။ အာရုံလဲမများတတ်ပါဘူး။

-ပရိသတ်ကြီးကိုရော ဘာများပြောချင်သေးလဲ။

ကျွန်တော်တို့အကောင်းဆုံးလုပ်နေပါတယ်။ စေတနာထားပြီးတော့ အကောင်းမြင်ပေးကြပါလို့အတတ်နိုင်ဆုံးအကောင်းဖက်ကတွေးပေးကြပါလို့ပရိသတ်ကြီးကိုပြောချင်ပါတယ်။ ကျွန်တော်တို့လဲအကောင်းဆုံးလုပ်ဆောင်နေပါတယ်လို့ပြောပြပေးသွားခဲ့ပါတယ်။

 

 

0 Shares
Trend Myanmar Team မှ စီစဉ်တင်ဆက်သော trend.com.mm တွင် ဖော်ပြပါရှိသော သတင်းများ၊ သတင်းဆောင်းပါးများ၊ ဘာသာပြန်ဆောင်းပါးများကို မည်သည့် facebook စာမျက်နှာ ၊ website များတွင်မဆို ပြန်လည်ကူးယူ ဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.