အကယ်ဒမီအမှီမြန်မာပြည်ကိုပြန်လာရင်း မြန်မာနိုင်ငံမှာပဲ အပြီးအပိုင်နေသွားကာ အနုပညာအလုပ်တွေ လုပ်သွားမယ့် လိုင်လာခန်း

12911010_1728291224096455_329068658_n.jpg

၁၉၉၇ ခုနှစ်အိန္ဒိယနိုင်ငံမှာ ကြော်ငြာလုပ်ငန်းနဲ့ပတ်သက်တဲ့ ကုမ္ပဏီတစ်ခုမှာအလုပ်ဝင်လုပ်ရင်း အားလုံးရဲ့ ထင်မြင်ယူဆချက်နဲ့ တိုက်တွန်း နှိုးဆော်မှုတွေကြောင့် ဓာတ်ပုံစရိုက်ဖြစ်တယ်လို့ပြောပြလာတဲ့သူကတော့ မြန်မာနိုင်ငံမှာမွေးပြီး အိန္ဒိယမှာ အနုပညာအလုပ်တွေ လုပ်နေခဲ့တဲ့ လိုင်လာခန်းပဲဖြစ်ပါတယ်။ ငယ်စဉ်ကတည်းက ပညာရေးဖက်ကိုပဲကြိုးစားခဲ့သလို သရုပ်ဆောင်တစ်ယောက်၊ မင်းသမီးတစ်ယောက်ဖြစ်ဖို့ဆိုတာသူ့စိတ်ကူးနဲ့အတွေးတွေထဲမှာ တစ်စွန်းတစ်စတောင် မရှိခဲ့ပါဘူးတဲ့။ အိန္ဒိယနိုင်ငံမှာ မင်းသမီးတစ်ယောက်ဖြစ်ဖို့မလွယ်ကူသလို ဘက်စုံမှာတော်ဖို့တတ်ဖို့အတွက် အချိန် ၁ နှစ်နီးပါး ပေးပြီးကြိုးစားခဲ့ရတယ်လို့သိရပါတယ်။ ၁၁ နှစ်နီးပါး အိန္ဒိယမှာ မော်လ်ဒယ်၊ သရုပ်ဆောင်၊ မင်းသမီးတစ်ယောက် အနေနဲ့ရပ်တည်ခဲ့ပြီး အခုလက်ရှိမှာတော့ အကယ်ဒမီ အမှီမြန်မာနိုင်ငံကို အပြီးပြန်လာကာ မြန်မာပြည်မှာပဲ မြန်မာသရုပ်ဆောင်တစ်ယောက်အနေနဲ့ရပ်တည်တော့မယ်လို့သိရပါတယ်။ ဧပြီ ၃ ရက်နေ့မှာကျင်းပမဲ့ အကယ်ဒမီပေးပွဲမှာလဲ သူမ ပါဝင်သရုပ်ဆောင်ထားတဲ့ တိုက်ဆိုင်မှုရှိလျှင် ဇာတ်ကားက တစ်ပြေးနေတာမို့ထိုဇာတ်ကားအကြောင်းအပါအ၀င်သူမရဲ့ အနုပညာရေးရာ အကြောင်းအရာ သိလိုသမျှကိုမေးမြန်းဖြစ်တဲ့အခါ

-ရန်ကုန်ကို ဘယ်နေ့ကပြန်ရောက်တာလဲအစ်မ။

မ ရန်ကုန်ကိုပြန်ရောက်တာ အခုဆို  တစ်ပတ်လောက်ပဲရှိပါသေးတယ်။

-အကယ်ဒမီပွဲနဲ့ပတ်သက်ပြီး ဘယ်လိုမျိုးလေးပြင်ဆင်ထားလဲ။

မက ဒီမှာမရှိတဲ့အတွက် ရန်ကုန်ရောက်မှပဲ ပြင်ဆင်မှုကို စလုပ်ရတာပေါ့။ အကယ်ဒမီအတွက်မကို ဖုန်းတွေဆက်ကြတယ်။ အရမ်းနောက်ကျနေပြီ။ မြန်မြန်လာပါတော့တဲ့။ မမက ဟိုမှာလဲ အလုပ်ကမအား ဆိုတော့ မလာနိုင်ဘူး။ အခုနောက်ဆုံးကျမှ မထူးတော့ဘူး။ ၁၀ ရက်လောက်ပဲလိုတော့တယ်။ ငါလာမှဖြစ်မယ်ဆိုပြီး လာဖြစ်တာပါ။ မမရွေးလိုက်တဲ့ ဒီဇိုင်နာကလဲ ၁၀ ရက်နဲ့အပြီးလုပ်ပေးမယ်ဆိုတော့ အဆင်ပြေသွားတာပေါ့ ညီမလေးရယ်။

-ဒီဇိုင်နာ၊ ပိုးထည်၊ ကာလာလေးကိုပြောပြပေးလို့ရမလား။

အဲ့ဒါကတော့ အကယ်ဒမီပွဲနေ့မှပဲကြည့်ပါတော့ပေါ့။ အခုတော့ ပရိသတ်ကြီးကို လျှို့ဝှက်ထားပါရစေဦး။ ဒီဇိုင်နာကလဲ မပြောပါနဲ့ဦးဆိုလို့လေ။

-အခုအကယ်ဒမီတန်းဝင်နေတဲ့ တိုက်ဆိုင်မှုရှိလျှင်ကားမှာ ပါဝင်သရုပ်ဆောင်ဖြစ်ပုံလေးကိုလဲ ပြောပြပေးပါဦး။

မမက ဘောလီးဝုဒ် မှာရုပ်ရှင်စရိုက်တဲ့အခါကျတော့ ဒီမှာလာပြီး သတင်းစာရှင်းလင်းပွဲတစ်ခု လုပ်တယ်။ အဲ့ဒီပွဲမှာ မြန်မာ့ရုပ်ရှင်ဥက္ကဌ ကောင်စီလဲလာတယ်။ ဦးမျိုးလဲလာတယ်။ အဲ့ဒီမှာ မမရိုက်ထားတဲ့ ကုလားကားရဲ့ ထွေလာလေးတွေပြတယ်။ အဲ့ဒါကိုဦးမျိုးကကြည့်ပြီးတော့ စကမ်းလှမ်းတာပေါ့။ တိုက်ရိုက်မှုရှိလျှင် ဇာတ်လမ်းလေးက သူ့ခေါင်းထဲမှာရှိပြီးသားပေါ့။ မမဆီကို သူလာတယ်။ သမီးအန်ကယ့်ဆီမှာဒီလိုမျိုး ဇာတ်လမ်းလေးတစ်ခုရှိတယ်။ ဆွေးနွေးချင်တယ်ဆိုပြီးသူလဲအချိန်မရ ကိုယ်လဲအချိန်မရနဲ့အလွဲလွဲအချော်ချော်ဖြစ်သွားတယ်။ အဲ့ဒီနောက်ပိုင်းမှာမှ ဦးမျိုးကသမီးဒီမှာအားလုံးအဆင်သင့်ဖြစ်နေပြီ။ သမီးရက်ပဲလိုတော့တယ်ဆိုတော့မှ တစ်လလောက်အချိန်ပေးပြီးရိုက်ဖြစ်ခဲ့တာပေါ့။ ဇာတ်ညွှန်းကို နားထောင်တဲ့အခါမှာလဲ မအရမ်းသဘောကျတယ်။ ဘာလို့လဲဆိုတော့ ပေါ့ပျက်ပျက် ဇာတ်လမ်းမဟုတ်ဘူးလေ။ ပညာပေးဇာတ်လမ်းဖြစ်တယ်။ ကိုယ့်ကိုယ်စိန်ခေါ်တဲ့ ကာရိုက်တာတစ်ခုလဲဖြစ်တယ်။ သရုပ်ဆောင်တစ်ယောက်အတွက်လဲ အဲ့ဒီလိုကာရိုက်တာရဖို့ဆိုတာ ကံကောင်းတယ်လို့ပြောရမယ်။ အိုက်တင်ကို ကိုယ်ထုတ်ပြလို့ရတယ်။ ပြီးတော့ လုပ်နိုင်သလောက် အကျိုးရှိတယ်။ အဲ့ဒါကိုသဘောကျတာနဲ့ မမကိုယ်တိုင်ကအဲ့ဒီလိုကာရိုက်တာမျိုးကို တကယ့်မမဘ၀အစစ်မှာဆို အရမ်းမုန်းတယ်။ ကိုယ်အရမ်းမုန်းတဲ့ ကာရိုက်တာတစ်ခုကိုလုပ်နိုင်တယ်ဆိုရင် ဆိုတဲ့ စိန်ခေါ်မှုတစ်ခုနဲ့မမဒီကားကို အကောင်းဆုံးလုပ်ပြခဲ့တယ်။ အားနာတဲ့အပေါ်မှာ မိသားစုတစ်ခုပြိုကွဲနိုင်တယ်ပေါ့။ အဲ့ဒီကားထဲမှာကိုပြေတီဦးက သစ္စာဖောက်တာမဟုတ်ဘူး။ အားနာတာပေါ့။ သနားတာပေါ့။ အိမ်ထောင်ရှိနေတဲ့ လူတစ်ယောက်ကတခြားမိန်းမတစ်ယောက်ကို သနားရင် အားနာရင် ကိုယ့်အိမ်ထောင်ကို ဘယ်လောက်ထိ ထိခိုက်နိုင်လဲဆိုတာကို ပြချင်တာပေါ့။

-အဲ့ဒီကားရိုက်တုန်းက အမှတ်တရအနေနဲ့ ဘာတွေရှိမလဲ။

အရာရာတိုင်းက အမှတ်တရပဲ။ မြန်မာပရိသတ်တွေနဲ့ပထမဆုံးထိတွေ့တဲ့ကားလဲဖြစ်တယ်။ နောက်မမအတွက်က ပထမဆုံးမြန်မာကားလဲဖြစ်တယ်။ မမအမြဲတမ်း အင်္ဂလိပ်လိုနဲ့ကုလားလိုပဲသုံးပြီး ၁၁ နှစ်လောက်ပြောလာတဲ့အတွက် ဒီမှာ မြန်မာစကားနဲ့မြန်မာကားကို ပထမဆုံးရိုက်ကူးခွင့်ရတဲ့ကားကြီးဖြစ်တဲ့အတွက်အမှတ်တရပါပဲ။ ကိုယ်ကမြန်မာဆိုပေမဲ့ ဟိုမှာ အချိန်အကြာကြီးနေပြီးမှပြန်ရိုက်တာဖြစ်တယ်။  ရုပ်ရှင်စကားလုံး အသုံးအနှုန်းလေးတွေကျတာ့ ခဲယဉ်းတယ်။ ပဟေဌိဆန်တယ်။ ကဗျာဆန်တယ်။ အဲ့ဒီလိုစကားလုံးလေးတွေကိုအာရုံစိုက်ရတယ်။ အိုက်တင်ကိုလဲအာရုံစိုက်ရတယ်ဆိုတော့ မအတွက် ၁ ရက်၊ ၂ ရက်ကတော့ ခက်ခဲခဲ့တယ်။ ဒါပေမဲ့ နောက်ရက်တွေကျတော့ အဆင်ပြေသွားပါတယ်။ မြန်မာနိုင်ငံက ရိုက်ကွင်းအနေအထား၊ အသုံးပြုတဲ့စက်နဲ့ သူတို့ရဲ့ Production ပိုင်းတွေအစ မ သိခဲ့ရတယ်။ ပညာရတာပေါ့နော်။ အစစအရာရာက အတွေ့အကြုံကောင်းတွေကြီးပါပဲ။

-မြန်မာသရုပ်ဆောင်တွေနဲ့ပထမဆုံးသရုပ်ဆောင်ရတဲ့အတွက် အိုက်တင်ပိုင်းနဲ့ပတ်သက်ပြီး ဟိုမှာလိုပဲသရုပ်ဆောင်တာလား။ ဟိုနိုင်နဲ့ဒီနိုင်ငံမှာ သရုပ်ဆောင်မှုအပိုင်းနဲပတ်သက်ပြီးကွာခြားချက်ကဘယ်လိုရှိလဲ။

ဘယ်လိုခေါ်မလဲညီမလေးရယ်၊ ကိုယ့်မြန်မာလူမျိုးအချင်းချင်းဖြစ်တဲ့အတွက် မအတွက်ကတော့ မစိမ်းဘူး။ ငယ်ငယ်လေးကတည်းက ဒီမှာမွေးပြီးဒီမှာပဲကြီးခဲ့တာကိုး။ အစ္စလာမ်ဘာသာ သူငယ်ချင်းတောင်တစ်ယောက်မှ မရှိဘူး။ ကိုယ့်မြန်မာလူမျိုးတွေနဲ့ဖက်လှဲတကင်းနေရတာက ဘယ်လိုမှမခက်ခဲဘူး။ အရမ်းကိုအဆင်ပြေချောမွေ့တယ်။ ဒါပေမယ်လို့အိုက်တင်ကျတော့ သူတို့ကိုကြည့်ရတာပေါ့။ မတူဘူး။ နိုင်ငံခြားမှာက အိုက်တင်လုပ်ရတာ အရမ်း Natural ဖြစ်တယ်။ ဒီမှာက နည်းနည်းလေး ဆွဲပြီးတော့ ပြောရရင် ရုပ်ရှင်ဆန်တယ်ပေါ့။ အဲ့ဒါလေးတွေ ရှိတယ်။ ဒါတောင်ဦးမျိုးက အရမ်းတော်ပြီး အရမ်းကောင်းပြီး သဘာဝကျတဲ့သူမို့လို့ဒီလောက်တော့မလိုဘူး။ ဒီလောက်တော့ လိုတယ်ဆိုပြီး ဘေးကနေပြောပေးနေလို့ပြောပေးတာပေါ့။ ဒါကတော့ မြန်မာ့ရုပ်ရှင်သဘာဝပေါ့။ သိပ်သဘာဝမကျဘူး။ ရုပ်ရှင်ဆိုတာသိနေရတယ်။ ငိုတာ၊ ရယ်တာ၊ စကားပြောတာကအစပေါ့။ အရာရာကဆွဲပြီး လုပ်နေတဲ့အတွက် နေ့စဉ်လုပ်နေတဲ့ပုံစံမျိုးမဟုတ်ဘူး။ သဘာဝမဆန်ဘူး။ အဲ့ဒီမှာ ကိုယ်ကဟိုမှာ ကိုယ်လုပ်နေကျအတိုင်း လုပ်ရင်ကောင်းမလား။ သူတို့လိုပဲ လိုက်လုပ်ရမှာလား။ အဲ့ဒါကိုလေ့လာရတယ်။ ကြည့်ရတယ်။ ဖြစ်ချင်တော့ အမအတွက်ကံကောင်းသွားတာက ဦးမျိုးက အင်နာနေရှင်နယ်မှာသွားပြီးရုပ်ရှင်နဲ့ပတ်သက်တာတွေကိုလေ့လာနေတဲ့သူလဲဖြစ်တယ်။ အတွေ့အကြုံလဲအများကြီးရှိတဲ့သူတစ်ယောက်ဖြစ်တဲ့အတွက် Natural ပုံစံကိုသူကပိုကြိုက်တယ်။ မဆို ဒါရိုက်တာဝိုင်းတို့၊ ဦးမျိုးတို့ကိုသဘောကျတယ်။ သူတို့က Natural ဆန်တယ်။ တချို့ကျတော့ ဒါရိုက်တာတွေကိုယ်တိုင်ကိုက လုပ်ခိုင်းတာမျိုးတွေရှိတယ်။ ဒါပေမဲ့ဦးမျိုးက သဘာဝဆန်တာကိုကြိုက်တဲ့အတွက်မမကံကောင်းသွားတယ်။ ဟိုမှာ သရုပ်ဆောင်တဲ့အတိုင်းပဲသရုပ်ဆောင်ခဲ့တယ်။ ကိုယ့်စတိုင်တိုင်းပဲပေါ့။ မဟုတ်ရင်ပိုခက်မှာသေချာတယ်။ မကဒီကအတိုင်းဆွဲပြီး သရုပ်ဆောင်ရတာကိုမလုပ်တတ်ဘူး။

-အဲ့ဒီကားထဲမှာ မမရဲ့ကာရိုက်တာက ပရိသတ်မုန်းတဲ့ကာရိုက်တာဆိုတော့ ဇာတ်ကားရုံတင်တဲ့အခါမှာ ပရိသတ်တွေရဲ့ဝေဖန်မှုကဘယ်လိုရှိလဲ။

ရုပ်ရှင်ကိုစလက်ခံတဲ့အချိန်တုန်းကကြောက်တာပေါ့။ ပရိသတ်ရဲ့တုန့်ပြန်မှုကို နည်းနည်းစိုးရိမ်တယ်။ ပထမဆုံးကားမှာ ပရိသတ်ရဲ့တုန့်ပြန်မှုကောင်းကောင်းကို လိုချင်ခဲ့တယ်။ ဘာကြောင့်လဲဆိုတော့ ပရိသတ်မမကိုသိထားတာကနိုင်ငံခြားက မင်းသမီးဒီနိုင်ငံမှာ ဇာတ်ကားလာရိုက်တယ်ပေါ့။ တကယ်က မမက မြန်မာနိုင်ငံကမိန်းကလေး နိုင်ငံခြားမှာ မင်းသမီးသွားလုပ်နေတာ အဲ့ဒီနှစ်ခုကို ပရိသတ်သိထားတာက ဆန့်ကျင်ဖက်ဖြစ်နေတဲ့အတွက်ဟာနိုင်ငံခြားမင်းသမီးကဒီနိုင်ငံကိုလာပြီးဒီလိုကာရိုက်တာလုပ်သွားပါလားဆိုတာကို စိတ်ပူခဲ့တယ်။ ဒါပေမဲ့ အထူးပွဲပြပြီးလူတွေရဲ့ တုန့်ပြန်မှုကိုသလိုက်ရတဲ့အချိန်မှာစိတ်အေးသွားတယ်။ အရမ်းတော်တယ်။ အရမ်းကောင်းတယ်။ အရမ်းသဘောကျတာပဲဆိုပြီးပြေးဖက်ကြတယ်။ နမ်းကြတယ်။ အဲ့ဒီမှာ ကိုယ့်ဆုံးဖြတ်ချက်ကို မှန်တယ်လို့သုံးသပ်မိတယ်။ နောက်တစ်ခုက ပြည်သူလူထုက ဒါရုပ်ရှင်ရိုက်နေတာ အိုက်တင်လုပ်နေတယ်ဆိုတာကို သဘောပေါက်သွားပြီ။ တချို့မင်းသမီးတွေဆိုရုပ်ရှင်ထဲမှာကောင်းကောင်းမွန်မွန်လုပ်တယ်။ အပြင်မှာဆို မကောင်းတာမျိုးရှိကြတာပဲ။ ရုပ်ရှင်ဆိုတာ အိုက်တင်ပဲလေ။ ကိုယ်ကအဲ့ဒီလိုမဟုတ်တာကို တော်တော်များများသိလာကြတဲ့အတွက် အဆင်ပြေသွားကြတာပေါ့။

-အဲ့ဒီကားနဲ့ပတ်သက်ပြီး အကယ်ဒမီရင်ခုန်သံကဘယ်လိုမျိုးရှိလဲ။

ရင်ခုန်သံကတော့ Artist တစ်ယောက်ဖြစ်တဲ့အပေါ်မှာ ကိုယ့်ရုပ်ရှင်ကားကဆုတွေ အများကြီးမှန်းထားခြင်းခံရတဲ့အတွက် ကိုယ်ပါပါမပါပါ ကိုယ့်ရုပ်ရှင်ပါတဲ့အတွက်ရင်ခုန်ပြီးသား၊ စိတ်လှုပ်ရှားပြီးသားပါ။ အားလုံးအတွက်ကို အကယ်ဒမီမျှော်လင့်တယ်။ ကိုယ့်အတွက်ကတော့ မျှော်လင့်သလားဆိုတော့ အစ်မ ငါးဆယ်၊ ငါးဆယ်ပါပဲ။ ဒိုင်တွေက ရသင့်တယ်လို့ဆုံးဖြတ်ရင် အရမ်းကျေးဇူးတင်မိမယ်။ ကိုယ်ကတော့ ကိုယ့်ပရိသတ်အတွက် အကောင်းဆုံးလုပ်ပေးပြီးသွားပြီ။ လူတွေက အကယ်ဒမီဆုရတာမရတာထက်ကို ရုံမှာစတင်ကတည်းက ဒီနေ့အထိ နေ့စဉ်နဲ့အမျှ အကယ်ဒမီပေးနေတဲ့ပရိသတ်တွေနဲ့တင်အရမ်းကိုပီတိဖြစ်နေပြီ။ အရမ်းကျေနပ်သွားပြီ။ အကယ်ဒမီဆိုကိုလိုချင်လား။ ပေးရင်တော့လိုချင်တယ်။ မပေးရင်လဲပြသနာမရှိပါဘူး။ ကားတွေဆက်ရိုက်သွားမှာပါ။

-ပထမဆုံးအကြိမ်အကယ်ဒမီပေးပွဲကိုတက်ရောက်ရမဲ့ အတွက်ရော ဘယ်လိုရင်ခုန်နေလဲ။

အရမ်းပျော်ပါတယ်။ ဘာလို့လဲဆိုတော့ ဒါကိုယ့်မြန်မာနိုင်ငံမှာ ပထမဆုံးအကြိမ်တက်ရမဲ့ပွဲဖြစ်တယ်။ ဘယ်လိုအပြင်အဆင်တွေဖြစ်မလဲ။ မင်းသားမင်းသမီးတွေက ဘယ်လိုတွေဝတ်စားလာကြမလဲ။ ဘယ်လိုဖျော်ဖြေမှုတွေရှိသလဲပေါ့။ အကယ်ဒမီပေးပွဲကို မဆိုတီဗီကနေ တစ်ခါလောက်ပဲကြည့်ဖူးတာဆိုတော့ သိပ်မသိဘူး။ အတွေ့အကြုံသစ် တစ်ခုဖြစ်တယ်။ ပြီးတော့ မ ပါဝင်တဲ့ကားကလဲ အကယ်ဒမီဆုတွေ အများကြီးချိတ်မယ်ဆိုတော့ အဲဒါလေးကိုလဲအားပေးချင်တယ်။ တခါကိုယ့်ကိုလဲ ပရိသတ်တွေကမှန်းပေးကြတယ်ဆိုတော့ စိတ်လှုပ်ရှားမှုတွေကတော့ တစ်ပုံကြီးပါပဲ။

-အခု မြန်မာနိုင်ငံမှာရော ဇာတ်ကားတွေဆက်လက်ရိုက်ကူးဖို့ရှိဦးမလား။

မမ ဦးမျိုးနဲ့  ရာဇ၀င်ရိုင်းသူများကားရိုက်ထားတယ်။ အဲ့ဒါလဲအိမ်ထောင်ရေးဇာတ်လေးပဲ။ ဒါပေမဲ့မမက အချိန်မပေးနိုင်တဲ့အပေါ်မှာ သိပ်အများကြီးလက်ခံလို့မရဘူး။ ကြားထဲမှာ အလုပ်တွေမအားတဲ့အတွက်ရာဇ၀င်ရိုင်းသူများရိုက်ပြီးမမပြန်သွားရတယ်။ အခုတတိယကားတွေအတွက် ဇာတ်ညွှန်းကလဲ နားထောင်ပြီးသွားပြီ။ ဦးမျိုးနဲ့ပဲ။ ဒီကြားထဲမှာရိုက်ဖို့ရှိတယ်။ အခုအကယ်ဒမီပြီးသွားရင်တော့ မမဒီမှာနေဖြစ်ဖို့များသွားပါပြီ။ ဘာလို့လဲဆိုတော့ ဟိုကအလုပ်တွေကိုမမဖြတ်လိုက်ပြီ။ ဒီမှာဇောက်ချပြီး ဇာတ်ကားလေးတွေလက်ခံပြီးဆက်ရိုက်သွားမယ်။

-အခုဒီတစ်ခေါက်က မြန်မာနိုင်ငံကို အပြီးပြန်လာတာလား။ အရင်လိုသွားလိုက်ပြန်လိုက်ပဲလား။

အခုတစ်ခေါက်ကနှစ်နဲ့ချီပြီးနေပေးသွားမယ်။ သွားရင်လဲ တစ်ပတ်၊ ဆယ်ရက်လောက်ပဲ။ အရင်ကဟိုမှာ အထိုင်နေပြီး မြန်မာပြည်ကို တစ်ပတ်၊ ဆယ်ရက်ပြန်လာတာ။ အခုတော့ ဟိုကအလုပ်တွေကို နားလိုက်ပြီဖြစ်တဲ့အတွက် ဒီဖက်ကိုပြန်ပြီးဂရုစိုက်ချင်တယ်။ ဒီဖက်မှာပဲအလုပ်လုပ်တော့မယ်။ အစ်မဒီကိုဘာကြောင့်အပြီးပြန်လာဖြစ်တာလဲဆိုတော့ အစ်မနဲ့စေ့စပ်ထားတဲ့သူက ဘောလီးဝုဒ်  ရုပ်ရှင်ရိုက်တာကိုမကြိုက်ဘူး။ ပြီးခဲ့တဲ့နှစ်ထဲကနားလိုက်တာပါ။ ကျန်တဲ့ဟာလေးတွေကိုပဲ ဖြတ်ပေးနေတာ။ အခုတော့ပြီးသွားပြီဆိုတော့ ဒီဖက်ပဲ ဇောက်ချပြီး လုပ်ဖြစ်သွားတာပါ။ မြန်မာကားကျတော့ မိသားစုကြည့်လို့ရတယ်လေ။ ဟိုကကားတွေကတော့ လက်မခံနိုင်ဘူး။ ဘာညာဆိုတာနဲ့မရိုက်ဖြစ်တော့တာပါ။

-လက်ရှိ အချစ်ရေးကရော ဘယ်လိုရှိလဲ။

အချိန်တန်လို့ရွေးချယ်ရမယ်ဆိုတော့လဲ ရွေးချယ်လိုက်တယ်ပေါ့။ သိပ်ကြီးဆယ်ကျော်သက်အရွယ်လို ချစ်တာတွေ၊ နစ်တာတွေတော့ မဖြစ်ဘူးပေါ့။ ဦးနှောက်နဲ့ပဲ ဆုံးဖြတ်ပြီး သင့်တော်တာလေးကိုရွေးချယ်ခဲ့တယ်။ အဆင်ပြေမယ်ထင်လို့ပါ။ ညှိတဲ့အခါသူကလဲ ဟိုမှာ ရုပ်ရှင်မရိုက်ပါနဲ့ဆိုလို့ကိုယ်ကလဲ သူ့တောင်းဆိုမှုကို မှန်တယ်ထင်တာနဲ့လက်ခံဖြစ်ခဲ့တာပါ။

-ဘယ်နိုင်ငံသားလဲဆိုတာပြောပြပေးလို့ရမလား။

တူရကီနိုင်ငံသားပါ။

-မင်္ဂလာသတင်းကရော ဘယ်တော့လောက်ဖြစ်မလဲ။

မပြောတတ်သေးဘူးညီမ။ သူအားတာနဲ့ကိုယ်အားတာလဲရှိသေးတော့လေ။ သူကလဲ အင်ဂျင်နီယာတစ်ယောက် သူ့အလုပ်နဲ့သူဆိုတော့ အမြန်ဆုံးတော့ဖြစ်လိ့မ်မယ်လို့ထင်ပါတယ်။

-အစ်မကိုအားပေးနေတဲ့ ပရိသတ်တွေကိုရော ဘာများပြောချင်သေးလဲ။

အစ်မရဲ့ကားလေး အကယ်ဒမီ တန်းဝင်တဲ့အတွက် အားပေးတဲ့ပရိသတ်ကိုကျေးဇူးအများကြီးတင်ပါတယ်။ သူတို့သာအားမပေးရင် ဒီလိုအခြေအနေရောက်လာစရာမရှိဘူး။ ဘာကြောင့်လဲဆိုတော့ မ ကားက ဒီဗီဒီမထွက်သေးတဲ့အတွက်ရုံမှာကြည့်တဲ့ အတိုင်းအတာလောက်နဲ့ကို ဒီလိုအနေအထားတစ်ခုဖြစ်လာတဲ့အတွက် ပရိသတ်တွေကိုကျေးဇူးတင်တယ်။ နောက်ထပ်ထွက်လာတဲ့ ကားတွေကိုလဲ အားပေးကြပါလို့ပြောချင်ပါတယ်။ အကယ်ဒမီဆုမရခဲ့ရင်တောင် ပရိသတ်ကြီးပေးထားတဲ့အကယ်ဒမီဆုနဲ့တင် ကျေနပ်နေပါပြီ။ အကယ်ဒမီဆုသာရခဲ့ရင်တော့ အတိုင်းအထက်အလွန်ပါပဲ။ အဓိကက ပရိသတ်ပါပဲ။ ကျန်တာကတော့အရေးမကြီးပါဘူး။ 

0 Shares
Trend Myanmar Team မှ စီစဉ်တင်ဆက်သော trend.com.mm တွင် ဖော်ပြပါရှိသော သတင်းများ၊ သတင်းဆောင်းပါးများ၊ ဘာသာပြန်ဆောင်းပါးများကို မည်သည့် facebook စာမျက်နှာ ၊ website များတွင်မဆို ပြန်လည်ကူးယူ ဖော်ပြခြင်းကို ခွင့်မပြုပါကြောင်း အသိပေး ကြေညာအပ်ပါသည်။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.